Saturday, August 09, 2008

حوار معي في جريدة الأهرام و شوية أخبار أحلى من بعض



يا جماعة أنا آسفة على الأختفاء المطول ده، لكن غصب عني و الله

المهم، الأسبوع ده حصلت لي حاجات حلوة و مفرحة كتير جدا، أهمها على الإطلاق إني اتنشر لي حوار في جريدة الأهرام بحجم صفحة كاملة، أضغطوا على الصورة المأخوذة عن الجريدة أعلاه لتكبيرها

بخلاف ذلك إن شاء الله بكرة أو بعده سأنشر نص الحوار بالضبط لتتمكنوا من الإطلاع عليه و مستنية رأيكم طبعا

كمان ماما حالتها الصحية بتتحسن و أنا جددت سيارتي و أخويا خطب بنت خالي والمحاضرات اللي أنا قدمتها في أمريكا في جامعة هارفارد و معهد كاتو و معهد هدسون مسمعة بشكل جميل و لغاية النهاردة بستلم إيميلات من ناس حضرت لي و بتشكرني عليها، أكيد قريب هاكتب لكم بالتفصيل

غير كده الديوان الشعري الأول لي أكتمل فعلا و قريب جدا جدا هنشره، أتمنى يعجبكم

بالمناسبة، عندي حاجة كمان عاوزة أقولها، بس بلاش تضحكوا... ولا أضحكوا.. أنا نفسي قعدت أضحك على نفسي يوم كامل

الأسبوع ده أضطرتني الظروف لمقابلة واحد كنت توهمت في يوم من الأيام إني حبيته، والمشكلة إنه هو ساعتها عاش الدور ع الآخر و أفترى فيّا بشكل مش معقول، و استغلني أسوأ استغلال في الدنيا

المهم.. حصل اللي حصل و كل واحد راح لحاله، لحين تقابلنا هذه المرة منذ أيام لرد أمانة إلى أصحابها.. و كنت شاية هم مقابلته بشكل؟ و كنت خايفة من نفسي جدا

لكن اللي حصل كان غير كده خااااااالص، لأن كان أهم من رد أمانتي بالنسبة لي إني اتصدمت في نفسي.. وقفت قدام أخينا ده مستغربة من نفسي جدا، إزاي أنا بصيت له أساسا في يوم من الأيام؟ ده ما فيهوش ميزة واحدة ممكن تخلي أي بنت مهما كانت ساذجة تتشد له؟ أزاي حصل معايا كده؟ و عنيا كانت فين؟

مش عارفة والله العظيم! و أفتكرت واحدة صاحبتي ربنا يمسيها بالخير قالت لي إن ساعات الواحد غريزيا الفضول بيدفعه لأنه يمد إيده في صفيحة الزبالة عشان يعرف جواها إيه، و بناءا على ذلك المفروض أن لا نبحث عن تفسير منطقي لأي تصرف غير منطقي نقوم به، لذلك قررت أن أصنف هذه الحادثة في حياتي ضمن صفائح الزبالة و الدوافع غير المنطقية للعبث

ما علينا، قبل ما أمشي حاجة كمان على السريع، ما حدش يعرف شريط أنغام الجديد نازل أمتى؟